Hordhaca Kulanka Spain vs Chile: Wiilasha La Roja Oo Doonaya Iney Kasoo Kabtaan Xasuuqii Oranje

Xulka Spain oo ah dalka difaacanaayo koobka aduunka ayaa qarka u saaran inay gabi ahaanba isaga haraan tartankan qiimaha badan hadii caawo ay dhigeeda Chile guuldaro kala kulmaan, ma jirin qof filaayay in Spain kulankeedii ugu horeeyay 5-1 xasuuq ah ay kala kulmi doonaan xulka Holland sidaa darteed dhamaan dadka ka faaloodaan cayaaraha waxay kala laabteen kalsoonida Spain waxayna haatan ku tilmaameen xul calankiisa sii dhacaayo.

Dhanka reer Chile iyaga cadaadis ma saarno sidaa darteed waxay ku raaxeesanayaan koobka aduunka weliba kulankoodii ugu horeeyay 3-1 waxay kaga tilaabsadeen Australia dabcan caawo ayay tijaabo culus mari doonaan waxayna diyaar u yihiin inay geesinimo iska raadiyaan una bac bac dhigaan awooda xulka Spain.

Aqbaar ku saabsan diyaar garowga ay labadan xul ku jiraan:

Macalin Del Bosque isaga ma qarsanin inuu xulka Spain isbadal xoogan ku sameyn doono kadib guuldaradii Holland ayuu saxaafada la hadlay wuxuuna yiri “dabcan isbadal ayaan ku sameyn doonaa Line Up-keyga kulanka Chile waxaan heesana 23-xidig oo tayo wanaagsan sidaa darteed waa muhiim xidigaha aan heesto inaan caawo ka faa’iideesto oo aan fursad siiyo” nasiib wanaag goolhaye Iker Casillas isaga ayaa caawo kulankan adag qaban doono inkastoo furitaankii uu soo bandhigay cayaar aan la jecleesanin waayo wiilkii badali lahaa David De Gea dhaawac halis ah ayaa soo gaaray balse Javi Martinez ayaa lagu wadaa in caawo lagu soo bilaabo.

Macalinka xulka Chile Jorge Sampaoli isagana wuxuu ka warsugi doonaa xaaalada Arturo Vidal inkastoo xidigan uu kulankii hore ku dhawaad 60-daqiiqo cayaaray hadana weli si wanaagsan uma soo kabanin sidaa dareed kulanka Spain caawo wuu ka qayb qaadan doonaa balse lama hubo inuu dhameesan karo iyo in kale.

Dhacdo la xariirto kulankan xiisaha badan:

• Xulka Chile marnaba ma aysan ka helin wax guul ah dhigooda Spain waxayna la cayaareen 10-kulan taariikh ahaan weliba 8-ka mid ah Spain ayaa guuleesteen halka 2-kulana ay bar bar dhac ku kala baxeen.
• Guud ahaan labo jeer ayay labadan xul koobka aduunka ku kuulmeen waxaana labada jeer guuleesatay Spain 1950 (2-0) iyo 2010 (2-1).
• Ka hor kulankii Spain 5-1 guul daro kala kulantay xulka Holland waxaa ugu dambeesay isla tartankan oo 5-gool looga badiyo tartankii 1950 waxaana markaas 6-1 ku suul daartay Brazil.
• Alexis Sanchez 7-kulan ee ugu dambeesay oo uu xulkiisa Chile u saftay wuxuu dhaliyay 6-gool sidoo kalena hal gool ayuu dhiibay.
• Xulalka France iyo Italy oo tartankan ku guuleesteen sanadihii 1998 iyo 2006 waxay ku hareen qaybta guruubyada ayagoo koobkan difaacanayaan sanadihii 2002 iyo 2010 hadaba Spain caawo ceebtaas oo kale maka bad baadi doontaa?

Line Up-ka macquulka oo ay labada xul kusoo gali doonaan:

Spain: Casillas, Ramos, Martinez, Alba, Azpilicueta, Alonso, Busquets, Xavi, Silva, Pedro

Chile: Bravo, Isla, Mena, Medel, Jara, Diaz, Aranguiz, Vidal, Sanchez, Valdivia, Vargas.

Abdirashid Mohamud Nor "SHarDinHO"

Waa Tifaftiraha & Madaxa Shaqaalaha Shabakadda Ciyaaraha Hiilkubad, Sidoo kalana Waa Tifaftiraha Wargeyska Horyaal Sports ee kasoo baxa Magaalada Muqdisho.

More Posts - Website