Hordhac: Liverpool vs Chelsea: Reds Oo Talaabadii Ugu Weyneyd U Qaadi Karta Hanashada Horyaalka

Naadiga horyaalka hogaamineyso Liverpool waxay garoonkeeda Anfield ku marti qaadi doontaa Chelsea oo haatan kaalinta 2-aad kaga jirto Premiership-ka wiilasha macalin Brenden Rodgers hadii ay galabta guuleestaan waxay ku dhawaan doonaan in loo caleemo saaro guuleestayaasha horyaalka England dhanka macalin Jose Mourinho isaga horey ayuu u sheegay in kulankan kuluul iyo qabow midna uusan ku heyn kaliya wuxuu ka fikiraa sidii uu arbacada naadiga Atletico Madrid kaga taqalusi lahaa sidaa darteed Mourinho muxu bilaabay dagaalkiisa dhanka maskaxda mise waa ka dhab inuu Liverpool u fasaxo hanashada Premiership-ka!

Macalinka kooxda Liverpool Rodgers wuxuu saxaafada u sheegay in kooxdiisa uusan cadaadis saarneyn sidoo kalena Chelsea cadaadiska saaran yahay wuxuuna ka dhawaajiyay in Reds galabta hadafkeeda uu yahay inay guuleesato kulankeedii 12-aad waayo Man City oo kulan u harsan ayuu macalinkan ka walaacsan yahay mana doonayo in kooxdiisa ay kufto xili Premiership-ka uu gabo gabo ku dhow yahay.

YAA MAQAN, YAASE CIYAARI DOONA?

Daniel Sturridge ayaa lagu wadaa inuu galabta garoomada dib ugu soo laabto wuxuuna badali doonaa xidiga reer Brazil Lucas Leiva oo todobaadkii hore kulankii Norwich City cayaaray, balse Victor Moses kulankan kama qayb qadan doono madaama Chelsea milkiyadiisa leedahay Liverpool uma safan karo sidoo kale Jordan Henderson isagana ganaax ayuu ku maqnaan doonaa.

Dhanka Chelsea dhibaato badan ayaa heesato madaama labada hogaamiye Petr Cech iyo John Terry ay dhaawac ku maqnaan doonaan sidoo kale Ramires isagana ganaax ayuu ku seegi doonaa waxaa kaloo macquul ah in Eden Hazard iyo Samuel Eto’o uu macalin Mourinho nasiyo madaama ay dhaawacyo kasoo kabanayaan.

MA OGTAHAY

• Liverpool 21-kulan ee ugu dambeesay oo ay Anfield ku qaabishay kooxda Chelsea waxay guuleesatay 13-ka mid ah halka 4-kulan ay bar bar dhac ku kala baxeen sidoo kalena 4-kulana Blues ayaa guuleesatay.
• Liverpool 16-kulan ee ugu dambeesay Premiership-ka wax guuldaro ah lama kulmin waxay guuleesatay 14-kulan halka 2-kulana ay bar bar dhac gashay.
• Guuldaradii ugu dambeesay Liverpool waxay 2-1 kala kulantay naadiga Chelsea 29-kii December ee sanadkii tahay Premiership-ka England.
• Macalin Jose Mourinho guud ahaan 8-kulan ayuu Premiership-ka Liverpool ka hortagay wuxuna guuleestay 6-ka mid ah halka hal kulan laga badiyay.
• Luis Suarez waa cayaaryahanka kaliya ee 30-gool gaaro Premiership-ka asigoon wax rigoore ah dhalinin waxaana iskoorkan la wadaago Andy Cole oo xili cayaareedkii 1993/94 dhaliyay 34-gool.
• Chelsea 3-kulan ee ugu dambeesay Premiership-ka oo ay ku cayaartay meel ka baxsan garoonkeeda waxaa laga badiyay 2-kulan.
• Chelsea waa naadiga ugu daafaca wanaagsan Premiership-ka waxaana laga dhaliyay 26-gool oo qura halka Livepool ay tahay kooxda ugu weerarka wanaagsan Premiership-ka madaama ay dhalisay 96-gool.
• Fernando Torres wuxuu ku guul dareestay 337-daqiiqo Premiership-ka England inuu gool ka dhaliyo kooxdiisii hore ee Liverpool asigoo xiran maaliyada Chelsea!

Line Up-ka ay labadan naadi galabta kusoo gali doonaan:

Liverpool: Mignolet, Johnson, Sakho, Skrtel, Flanagan, Gerrard, Allen, Coutinho, Sturridge, Sterling, Suarez

Chelsea: Schwarzer, Ivanovic, Cole, Cahill, Kalas, Lampard, Obi Mikel,Schurrle, Salah, Matic, Ba