Wargeyska L’Equipe ee kasoo baxa dalka faransiiska ayaa qoray in kooxda ka dhisan magaalada Milan ay hogaanka u heyso loolanka loogu jiro saxiixa daafaca reer Brazil ALex kaas oo ka tirsan kooxda Paris Saint Germain.
Heshiiska uu daafacaan kula jiro PSG ayaa sii idlaaday, wuxuuse rajo ka qabay inuu sii joogo kooxda, inkastoo arintaas ay soo afjarantay markii kooxdiisa ay lasoo saxiixatay David Luiz.
Tababaraha Paris Saint Germain Laurent Blanc ayaa xaqiijiyay shalay in Alex uu ka tagayo kooxda isla markaana uusan kasii muuqan doonin xili ciyaareedka soo aadan.
L’Equipe ayaa ku warameysa in Milan iyo Galatasaray ay ku raad joogaan xidigaan balse kooxda reer talyaani ayaa ku gacan sareysa iyadoo dooneysa iney 31-jirkaan xili ciyaareedka dambe kusoo biiriso Sansiro.
Kooxda Milan ayaa ku fashilantay iney xili ciyaareedka soo aadan kasoo muuqato tartamada yurub madama ay kooxda gashay kaalinta 8-aad ee horyaalka.
Alex ayaa waayay booskiisa koobka aduunka isagoo ku biiray liiska xidigaha daawan shaashadaha ama garoomada ka daawan doona koobka Aduunka oo ka qabsoomi doona Brazil.
