Kadib guuldaradii xanuunka badneyd ee soo gaartay Liverpool markii ay 2-0 qasaaro ah kala kulmeen Chelsea kulan ka dhacay Anfield tababaraha kooxda Liverpool Branden Rodgers ayaa iska diiday inuu dhaleeceeyo kabtankiisa Steven Gerrard kaas oo qalad uu geystay hogaanka looga qabtay dhamaadkii qeybta hore ciyaarta.
Kabtan Gerrard ayaa dhulka ku dhacay xili uu baas ka helay Sakho oo ay isku dhawaayeen balse dhicitaanka Kabtan Gerrard waxaa ka faa’ideysta talaabo dheere Demba Ba kaas oo suuragaliyay in Chelsea ay hogaanka u qabato ciyaarta daqiiqadii 45aad ee dhamaadkii qeybta hore.
Si kastaba Reds ayaa dhamaadkii gool kale uu ka dhaliyay Willian waxey sidaas halis ugu jirtaa iney weyso horyaalka ingiriiska oo ay qarka u saarneed iney ku guuleysato 24-sano kadib.
“Chelsea aad ayey isku difaacday, waan isku daynay wax walba oo aan qaban karnay balse ma noqon inaan ku hormarno” ayuu Rodgers u sheegay Sky Sports News.
“Qaabkooda wuxuu ahaa difaac, si fiican ayaana u maamulnay kulanka balse goolal gaadmo iyo qalad aan geysanay ah ayaa keentay inaan qasaarno.
“Gerrard wuu dhacay, waana hogaamiyaha kooxda isagoo guulo usoo hogaamiyay Reds mana mudna in lagu eedeeyo guuldaradii Liverpool ee Chelsea” Ayuu mar kale yiri Rodgers oo niyada u dhisay Kabtankiisa.
Luis Suarez ayaan wax muuqaal wanaagsan ah sameynin marka laga reebo sadex fursadood oo uu qasaariyay inkastoo weeraryahanka reer Uruguay xalay loo magacaabay xidiga ugu wanaagsan Premier League sanadkaan.
