Macalinka Frank de Boer ayaa ku guuleestay inuu naadiga Ajax ku hogaamiyo horyaalkii 4-aad oo xariir ah wuxuuna tababarahan mudan yahay amaan madaama uu dib usoo celiyay waayihii quruxda badnaa ee kooxdan faca weyn waxayna Ajax haatan noqotay naadi aysan ka daba hadli karin dhamaan kooxaha ku loolamaan hoyaalka Holland waayo 4-sano oo xariir ah ay ku guuleesatay horyaalkan xiisaha badan, Ajax kulankeedii ugu dambeeyay waxay bar bar dhac 1-1 la gashay naadiga Heracles dabcan halkaas dhibic ayay u baahneed madaama ay Ajax leedahay 70-dhibcood waxaana ka harsan hal kulan oo qura horyaalka Holland, macalin Frank de Boer ayaa taariikh dhigay madaama uu noqday tababarihii ugu horeeyay ee Ajax taariikh ahaan 4-horyaal oo xariir ah u qaado.
Frank de Boer oo 43-jir ah wuxuu Ajax u qaaday horyaalkeeii 33-aad haatan macalinkan dhalinta yar wuxuu iska bar bareeyay Luis Van Gaal oo horey Ajax 4-horyaal ugu qaaday, marka laga hadlaayo taariikh ahaan macalimiinta ugu qaadista badan horyaalka Holland kaalinta 3-aad ayuu kaga jiraa Frank de Boer waxaana ka koobab badan halyeeyaasha kala ah Rinus Michels oo 5-horyaal ku guuleestay iyo Guus Hiddink oo 6-horyaal qaada waana macalinka ugu horyaal qaadista badan dalka Holland taariikh ahaan. Hadaba kooxda Ajax aadbay ugu adkaan doontaa inay xagaagan ceshato De Boer madaama ay ku raad joogaan saxiixiisa kooxaha Barcelona iyo Inter Milan.
